Einfalt mál

Kæru vinir og vandamenn

Sidney, er borg sem engin ætti að láta fram hjá sér fara. Hún er bara frábær, algjörlega "breath taking" eins og sagt hér í Ástralíu. Við upplifðum þetta öll, hún minnir okkur örlítið á New York, svolítið á Boston og svo er hún líka pínu pons Evrópsk. Erfitt að lýsa þessu, myndirnar geta vonandi varpað betra ljósi á þetta.

Við fórum í siglingu um höfnina í morgun (2,5 klukkustund) langur tími, já, en höfnin er alveg einstaklega stór (vel af meistaranum gerð), þetta er stærsta náttúrulega höfn í heiminum, full af ranghölum, víkum og litlum ströndum. Mikið af ríka fólkinu býr niður við ströndina, þar sem húsin kosta vel á annað hundrað milljónir (fer eftir styrk krónunnar).

Höfnin er morandi full af hákörlum, þar eru helstu útungunarsvæði, og eina leiðin til að fara í sjóin hér er að vera innan hákarlaneta, sem eru þó ekki 100% trygg. Við slepptum allavega sjósundinu í dag.

Eftir siglinguna gengum við frá höfninni upp í bæ, gegnum "business" hverfið, við komum líka við í einni Verðbréfahöll til að kíkja á Ástralska markaðinn og við gátum ekki betur séð en að Westpac sé að gera yfirtökutilboð á öðrum banka, er það rétt? Eftir að hafa fengið nóg af jakkafötum, röltum við í gegnum verslunarhverfið og sáum reyndar nokkrar skóbúðir á leiðinni, það verður upplýst síðar hvort eitthvað var keypt.

Enduðum daginn á að skella okkur í bíó með strákana að sjá Iron man.....fín mynd. Ekki búið að ákveða hvað við gerum á morgun, en það verður eflaust enn eitt ævintýrið :-)